Nepal Disaster: Sadhguru Ne Khoya Apne 80 Pilgrims Ko; Isha Foundation Karega ₹1 Crore Ki Madad!
Nepal Flood Disaster: Sadhguru Ne Jatai Gehra Shok; Isha Nepal Karega Prime Minister Relief Fund Me ₹1 Crore Ka Daan
Kathmandu / New Delhi: Nepal aur Tibet border par aayi bhayanak flash flood (achanak aayi baad) ke baad poore desh me shok ki lahar hai. Is bhayanak prakritik aapda par dukh jatate hue jaane-maane adhyatmik guru aur Isha Foundation ke sansthapak Sadhguru Jaggi Vasudev ka ek behad bhavuk video sandesh samne aaya hai. Sadhguru ne Nepal ko apne dil ka ek behad ahem hissa batate hue is aapda me jaan gane wale sabhi shraddhaluon ke prati apni gehri samvedna vyakt ki hai.
Report ke mutabik, Kailash Mansarovar Yatra se laut rahe Isha Foundation ke ek bade group ke lagbhag 80 sadasya (pilgrims) is achanak aayi baad ki chapet me aakar lapata ho gaye hain. Sadhguru ne behad dukhi hote hue bataya ki ye sabhi log alag-alag desho se talluk rakhte the. Unhone bataya ki jab group ke leader Pravin ne immigration center par sabhi ke pohochne ki khabar di, uske thik kuch hi der baad yeh dardnak hadsa ho gaya.
Rahat Karya Me Madad Ki Appeal Aur ₹1 Crore Ka Elan
Sadhguru aur unke foundation ke sadasya lagatar prashasan se un ilakon me jaane ki anumati maang rahe hain jahan yeh tabahi aayi hai, takee wo khud rescue aur relief operations (rahat aur bachav karya) me madad kar sakein.
Iske sath hi, sankat ki is ghadi me Nepal ki madad ke liye Isha Foundation Nepal ne ₹1 Crore rupaye Nepal ke Prime Minister's Relief Fund me daan karne ka bada elan kiya hai. Sadhguru ne saaf kiya ki legal limitations ki wajah se Isha Foundation India sidhe taur par kuch nahi kar pa raha hai, isiliye Isha Nepal ke jariye yeh madad rashi commit ki gayi hai.
3 September Ko Hoga 'Kalabhairava Karma' Ritual
Sadhguru ne apne video sandesh me sadiyon purani Kailash Yatra ke mahatva ko samjhate hue kaha, "Kailash jaana koi maut ki ichha (death wish) nahi hai. Yeh hamari sanskriti aur civilization ka ek behad mahatvapurna hissa hai aur Nepal ki economy ke liye bhi zaroori hai."
Unhone bataya ki is hadse me jaan gane wale 80 logon ki aatma ki shanti ke liye 3 September ko India ke Isha Yoga Center me ek vishesh 'Kalabhairava Karma' performed kiya jayega, jisme wo khud hissa lenge. Unhone aam logon se bhi appeal ki hai ki agar unke paas is aapda me mare gaye anya logon ke naam aur photo hain, toh wo foundation ko bhejein takee unhe bhi is shanti pooja me shamil kiya ja sake.